البول سكرو


الفرق بين الـ ball screw والفتايل التانية بوست للمهندس


Ahmed Aboul Fotouh


احتراما لوقتك المقال هياخد منك دقيقتين


.


فتايل القلاووظ بتستخدم بشكل اساسي فى تحويل الحركة الدورانية لخطية .. زى ماكينات السى ان سى .. بتاخد حركة دورانية من موتور سيرفو او ستيبر وبتحولها لحركة خطية لكل اكس من الاكسات الخطية التلاتة الرئيسية والاكسات المساعدة.


.


فى البول سكرو 3 ميزات رئيسية :-


1- نقدر نقول مبيحصلش فيه تآكل : والسبب ان التآكل بيحصل لما جزئين بيحتكوا ببعض .. جزء منهم بيكون أقل (( صلادة )) من التاني فبيتاكل اسرع .. والصلادة هى مقاومة المادة للخدش .. اما فى البول سكرو .. فعملك الفتيل (( العامود )) و الجشمة (( الصامولة )) من مادة صلادتها عالية جدا .. وحطلك بينهم بلي من مادة صلادتها اقل .. فبالتالى البلي هو اللى هيتاكل بعد عمر مديد وهو دا اللى بيتغير .. غير ان الشكل الهندسى للبلي (( الكرة )) بيكون فيه ميزة عظيمة جدا .. انه بيلمس الاجزاء التانية فى نقطة .. بعكس البلح (( الاسطوانة )) بيلمس الاجزاء التانية فى خط .. والجشمة العادية بتلمس الاجزاء التانية فى مستوى كامل .. فكل ما كان سطح التلامس اقل كل ما كان التآكل اقل .


.


2- مفيهوش باك لاش .. الباك لاش او بلغة السوق (( البوش )) معناه انك تيجي تلف الاكرة بتاعة اكس معين من اكسات المكنة .. تلاقيها بتلف على الفاضى والمكنة مبتتحركش .. وبعد نص لفة مثلا تلاقيها بدأت تتحرك .. النص لفة اللى لفتها على الفاضى دى حصلت بسبب ان فيه تآكل فى الجشمة او الفتيل .. والجشمة بتكون اكتر بحكم انها بتكون من مادة صلادتها اقل دا غير انها طول الوقت على اتصال بسنون الفتيل .. النقطة دى اتعالجت عن طريق البلي وعن طريق تصميم الانفاق اللى بيمشى فيها البلي داخل الجشمة .. بطريقة عبقرية للاسف مش هقدر اشرحها كتابة .


.


3- مفيش احتكاك تقريبا .. الاحتكاك زى ما قولنا بيحصل فى نقطة على كل بلية موجودة فى الجشمة .. وبالتالى نقدر نقول مفيش احتكاك .. وان كانت دى ممكن تكون عيب فى بعض التطبيقات لكن لا مجال لذكرها تجنبا للتشتيت .


.


.


البول سكرو مينفعش يتصنع خراطة .. ليه ؟


لانك لو حاولت تصنعه على مخرطة سى ان سى هتقدر توصل لفتيل شبه البول سكرو .. لكن مش بنفس الصلابة .. ولا بنفس الصلادة .. ولا بنفس جودة السطح .. ولا بنفس دقة الابعاد .. وخد بالك ان الـ 10 مايكرون فى شغلنا دا بتفرق .. 


.


طيب بيتصنع ازاى ؟ 


بيتصنع عن طريق الدرفلة على البارد .. الطريقة دى بتنتج اجزاء ميكانيكية قوية جدا جدا .. صلادتها عالية جدا .. لكن مشكلتها بتكون ان فيها اجهادات حبيسة .. حاجة كدا اشبه بالواحد فينا وهو عمال طول اليوم يتعرض لمواقف خنيقة ويكتم جواه لحد ما يوصل لمرحلة انه يبقى على شعره .. اى كلمة ممكن تخليه ينفجر .. 


فحل المشكلة دى اننا بنجيب الفتيل بعد تصنيعه ونحمل عليه احمال ميكانيكية بالتدريج .. فمثلا لو هو يقدر يشيل 1000 كجم قوة .. بنحمله ب 100 وبعد شوية 200 وبعد شوية 400 وبعد شوية 700 وبعد شوية 1000 .. 


التحميل التدريجي دا بيخليه يتخلص من الاجهادات الحبيسة ويقدر يشيل الحمل اللى اتصمم علشان يشيله واللى بنشوفه فى الداتا شيت بتاعته ..


.


.


البول سكرو بيتم تعريفه فى السوق عن طريق 4 ارقام متتالية .. اول رقمين من الشمال بيعبروا عن القطر .. واخر رقمين بيعبروا عن الخطوة .


يعني مثلا لما نقول بول سكرو 1605 فاحنا بنقول ان الفتيل دا قطره 16 مم و خطوته 5 مم .


الاقطار الاكثر شيوعا هى 12 مم و 16 و 20 و 25 و32 و40